परंपरा व पावन इतिहास

पूज्य बापूजींचा जन्म १५ ऑगस्ट १९६८ रोजी पाल (ता. चाळीसगाव, महाराष्ट्र) येथे झाला. अवघे चौथीपर्यंत शिक्षण घेतलेल्या बापूजींनी वयाच्या १४ व्या वर्षी (१९८२) गृहत्याग केला. गावाजवळील टेकडीवर फलाहार करून सलग १७ वर्षे खडतर तपश्चर्या व ध्यानसाधना केली. सदगुरू भगवान श्री रामदेवजी बाबांच्या दिव्य प्रेरणेतून, त्यांनी संत श्री महादेव चैतन्य महाराज (श्री दगडूजी बापू) यांना आपले सदगुरू मानले. १६ नोव्हेंबर १९९५ रोजी त्यांना परमतत्त्वाचा दिव्य प्रकाशमय साक्षात्कार झाला. त्यानंतर चार वर्षे मौन व्रत पाळले आणि १ जानेवारी २००० रोजी हरिद्वार येथील विष्णु महायज्ञात मौन सोडले. जुलै २००२ मध्ये लोककल्याणार्थ 'अखिल भारतीय चैतन्य साधक परिवार'ची स्थापना केली. त्यांनी कोणताही मोबदला, मान किंवा देणगी न स्वीकारता अखंड निःस्पृह गीता-रामायण सत्संग दिले. श्री वृंदावन धाम (पाल) आणि श्री दगडूजी बापू धाम (चारुकेश्वर) या आश्रमांची स्थापना केली. १० डिसेंबर २००९ रोजी ब्रह्मचाऱ्यांना दिव्य प्रकाशाचा अनुभव सांगून, २५ डिसेंबर २००९ रोजी त्यांनी महासमाधी घेतली. महासमाधीपूर्वी त्यांनी पूज्य श्री गोपाल चैतन्य बाबाजी यांना कार्याचे आध्यात्मिक व संघटनात्मक उत्तराधिकारी म्हणून नियुक्त केले.

पूज्य बाबाजींनी वयाच्या १६ व्या वर्षापासून परम पूज्य बापूजींची अनन्य भावाने सेवा सुरू केली. पूज्य बापूजींनी त्यांना 'नैष्ठिक ब्रह्मचर्य' दीक्षा दिली. गुरुआज्ञेनुसार त्यांनी तब्बल ९ वर्षे अखंड मौन व्रत धारण केले आणि या काळात त्यांना गुरुकृपेने अनेक दिव्य अनुभूती प्राप्त झाल्या. २००४ मध्ये उज्जैन सिंहस्थ कुंभमेळ्यात बापूजींच्या पावन आज्ञेवरून त्यांनी मौन सोडले. त्यानंतर गुरुआज्ञेने लोककल्याणासाठी प्रवचने व सत्संग सुरू केले. बापूजींनी पाहिलेले अपूर्ण मंदिराचे स्वप्न साकार करत, बापूजींच्या पहिल्या पुण्यतिथीला श्रीहरी मंदिरात दिव्य मूर्तींची प्राणप्रतिष्ठा संपन्न केली. सध्या ते 'अखिल भारतीय चैतन्य साधक परिवार'चे अध्यक्ष तसेच 'अखिल भारतीय संत समिती'चे महाराष्ट्र प्रदेशाध्यक्ष म्हणून ५ प्रमुख आश्रमांचे संचालन, आरोग्य सेवा, युवा संस्कार आणि गोशाळा उपक्रमांचे नेतृत्व करत आहेत.